Ponteareas elixe por votación no Facebook o emprazamento do seu novo parque deportivo

O Concello de Ponteareas puxo en marcha unha votación en liña para atopar pola vía democrática e participativa o emprazamento máis indicado para os seus novos parques: o das novas modalidades deportivas calistenia e street workout. A iniciativa, impulsada pola Concellería de Deportes que dirixe Benito Márquez, desenvolveuse a través dunha enquisa na rede social Facebook, onde a veciñanza puido amosar a súa opinión ao respecto do emprazamento máis idóneo desta nova área deportiva ao aire libre, impulsada, en palabras do Concello, “para cubrir unha demanda veciñal e ampliar a oferta de modalidades deportivas”.
Os usuarios e usuarias de Facebook valoraron como máis acaida, en primeiro lugar, a súa instalación no Parque Ferro-Ucha cun 32,1% dos votos, seguido do parque das Pombas cun 24,7, e, máis distanciado, no parque anexo ao complexo deportivo de Pardellas cun 14,8%.