Presentan en Portugal o certame Curtas na Rede

María Geraldes, Mª Dolores Rodríguez Amoroso, Carlos Abrunhosa de Brito, Pablo Penedo e Manuel José Fernández Iglesias na presentación de Curtas na Rede

A Secretaría Xeral de Comunicación (a través da Dirección Xeral de Comunicación Audiovisual) e o Consello da Xuventude de Galicia presentaron en Porto a terceira edición do concurso Curtas na Rede, que rematará o 29 de outubro e que nesta convocatorio contará con novas e atractivas modalidades que se amosaron á mocidade portuguesa na Fundaçao da Juventude.
O director xeral de Comunicación Audiovisual, Manuel José Fernández Iglesias, destacou «a consolidación» do certame de curtametraxes e animou á participación nesta terceira edición. Fernández Iglesias estivo acompañado pola presidenta do Consello da Xuventude de Galicia, Mª Dolores Rodríguez Amoroso, o presidente do Consello de Administración da Fundaçao da Juventude de Portugal, Carlos Abrunhosa de Brito, e o participante en anteriores edicións do concurso, Pablo Penedo. No acto tamén participou a directora da Fundaçao, María Geraldes.
O director xeral destacou que a incorporación do Eixo Atlántico grazas á colaboración da Fundaçao da Juventude, supón «o establecemento dunha ponte dixital con Portugal», mentres que a presidenta do Consello da Xuventude de Galicia subliñou a «xenerosa acollida» do país veciño.
Curtas na Rede é un concurso dirixido a persoas a partir dos 15 anos, interesadas na creación audiovisual e multimedia, que poden presentar as súas obras a través da Internet entre o 14 de febreiro e o 8 de setembro, optando así a atractivos premios.