Preséntase no D6 o Guitar Hero World Tour

O propio Tony Hawk (á guitarra) participou na demostración do novo Guitar Hero

No congreso D6 organizado polo The Wall Street Journal fixo acto de presenza Bobby Kotick, de Activision (selo responsable de sagas como a de Call of Duty, Tony Hawk ou Guitar Hero), quen aproveitou a ocasión para comentar distintos detalles da actualidade do sector dos videoxogos, pero que destacou por empregar o evento para facer unha especie de concurso-presentación do Guitar Hero World Tour no que a cantante Paula Abdul formaba parte do xurado e entre os participantes se atopaba o patinador Tony Hawk.
Así, os asistentes puideron ver como será unha partida da futura entrega de Guitar Hero, sorprendendo pola boa aparencia da batería e a renovada aparencia da guitarra eléctrica. A posta en escena foi realmente magnífica, o que supón unha boa publicidade deste xogo que aínda se fará esperar, xa que antes chegará ao mercado o Guitar Hero Aerosmith.

Demostración do novo Guitar Hero durante o D6
Esta presentación en sociedade do Guitar Hero World Tour coincide co lanzamento dun anuncio a xeito de demo do que será o Guitar Hero: On Tour para Nintendo DS, o que sorprendentemente causou bastante rebumbio porque moitas persoas consideran que tal vídeo é nefasto, aínda que outros o entenden como unha homenaxe a certos anuncios televisivos que se facían nos anos 80.
No anuncio de On Tour podemos ver detalladamente cómo é o xogo, dende o seu manexo ata os ataques que se poden empregar no modo competitivo, pero a aparición do cantante Scott Weiland (de Stone Temple Pilots e Velvet Revolver) ambientando musicalmente as explicacións dun xeito moi ridículo (que se pode entender con humor) espertou moitas críticas, pero o certo é que o clip está a cumprir coa súa misión, pois está dando a coñecer o funcionamento do xogo e acadando publicidade gratuíta pola polémica suscitada.
Para opinar, o mellor é ver o vídeo, que garante uns minutos de diversión:

Presentación de Guitar Hero: On Tour