Principia tirará abaixo barreiras inclusivas para a nova xeración de investigadoras e investigadores
luns, 12 de abril do 2021
A
directora
da Axencia Galega de Innovación (GAIN), Patricia Argerey, presentou
este 12 de abril os detalles da sexta edición do programa Principia,
unha iniciativa para impulsar o emprego xuvenil (prevese a
contratación de 100 mozas e mozos) e o talento investigador galego
que pide paso (con este talento fortalecerase a capacidade de I+D das
empresas e centros de coñecemento), ao tempo que libera o camiño da
contratación de obstáculos para as mulleres e as persoas con
diversidades funcionais.
O
programa impulsado desde a Vicepresidencia segunda e Consellería de
Economía, Empresa e Innovación, cuxo prazo de solicitude remata o
vindeiro xoves, 15 de abril, contempla axudas por importe de 10.000€
por contrato que se poden complementar cun bono de formación de
1.000€ adicionais. Cun orzamento total executado de preto de 4,5M€
e un total mobilizado de máis de 13M€, ao longo das cinco edicións
anteriores realizáronse 542 contratos de calidade a persoas de ata
35 anos que se integraron en 282 entidades beneficiarias, o 78,9%
delas empresas. De todos eles, 318 (58,67%) foron contratos
indefinidos desde o inicio.
Patricia
Argerey explicou na súa intervención que “este programa responde
á vontade do Goberno galego de incentivar o emprego de calidade no
eido da innovación, favorecendo a incorporación de persoas
cualificadas e con capacidade de liderar e desenvolver actividades de
I+D+i, que permitan asegurar a sostibilidade e garantir a
competitividade do ecosistema galego a longo prazo”.
Amais,
a directora de GAIN salientou a vontade de Principia de botar abaixo
barreiras á integración e á igualdade, xa que, entre outras
cousas, busca “incentivar a contratación tanto de mulleres como de
persoas con diversidade funcional que desexen orientar a súa
carreira profesional ao campo da innovación”.
No
webinario desenvolvido este 12 de abril interviñeron tamén dúas
empresas beneficiarias do programa Principia en anteriores edicións,
que expuxeron a súa experiencia, poñendo de manifesto que nesta
iniciativa teñen cabida empresas de todos os sectores e tamaños.
A
primeira delas, Sociedad para el tratamiento de aguas residuales,
é unha gran empresa do ámbito do mantemento industrial, que
incorporou a unha profesional que se implicou no redeseño e
automatización de procesos de limpeza e hixiene industrial.
A
segunda foi unha micropeme dedicada á distribución de comida a
domicilio, Comida sana, rápida e barata, que aproveitou o
programa para contratar a dúas persoas e así avanzar no seu proceso
de dixitalización e desenvolver un software para dotar dun alto grao
de automatización a xestión dos traballos de cociña, desde o
avituallamento e a execución ata a comercialización.