Project Solara, unha plataforma para unha nova xeración de dispositivos centrados en axentes de IA

Microsoft aproveitou a conferencia Build 2026 para presentar Project Solara, unha nova plataforma de software e hardware deseñada especificamente para unha futura xeración de dispositivos nos que os axentes de intelixencia artificial se converterán na principal forma de interacción entre persoas e máquinas.
A iniciativa parte da idea de que os axentes deixarán de ser unha simple funcionalidade integrada nas aplicacións para converterse nunha nova unidade de programación e nunha nova interface de usuario. Esta evolución podería dar lugar a unha ampla diversidade de equipos especializados, desde dispositivos de sobremesa ata solucións portátiles, profesionais ou ultramóbiles.

Dos programas ás interaccións baseadas en axentes

Microsoft sostén que a informática atravesa unha transición comparable ás que no pasado permitiron o paso dos grandes sistemas centrais aos ordenadores persoais, destes aos teléfonos intelixentes e posteriormente aos wearables.
Distinguen tres fases na evolución da IA. Nun primeiro momento, a intelixencia artificial funciona como asistente dentro dunha aplicación tradicional. Nun segundo nivel, pasa a formar parte central da experiencia e redefine o funcionamento da propia aplicación. Finalmente, nun terceiro escenario, os axentes operan fóra das aplicacións, coordinando tarefas entre múltiples servizos, dispositivos e fluxos de traballo.
Segundo esta visión, a linguaxe natural convértese nunha nova tecnoloxía de interacción que reduce a dependencia de elementos tradicionais como teclados, pantallas ou aplicacións específicas.

Reducir o custo da especialización

Un dos obxectivos principais de Project Solara é facilitar a creación de novos tipos de dispositivos especializados.
Microsoft considera que historicamente desenvolver unha nova categoría de ordenador implicaba construír practicamente toda a infraestrutura tecnolóxica necesaria, desde o hardware ata os sistemas operativos, as interfaces, os servizos e as ferramentas para desenvolvedores. A aparición dos axentes permitiría simplificar boa parte destas capas e reducir os custos asociados.
A plataforma aposta polo concepto de interface baixo demanda (just-in-time UI), mediante o que un mesmo axente pode adaptar automaticamente a súa presentación a diferentes tamaños de pantalla, métodos de entrada ou modalidades de uso sen que os desenvolvedores teñan que crear versións específicas para cada dispositivo.

Unha plataforma de extremo a extremo

Project Solara preséntase como unha plataforma do chip á nube que combina procesamento local e servizos na nube de Azure.
Microsoft describe o sistema como unha especie de sistema operativo distribuído no que os dispositivos actúan como puntos de acceso a axentes que poden manter o seu estado e contexto compartidos entre diferentes equipos.

A plataforma articúlase arredor de tres piares:

• Preparación para contornos empresariais, con mecanismos de seguridade, privacidade, identidade e administración.

• Un modelo de interacción impulsado por axentes e interfaces adaptativas.

• A posibilidade de utilizar tanto axentes propios de Microsoft como desenvolvementos de terceiros.

Entre os compoñentes previstos figuran o sistema Microsoft Device Ecosystem Platform (MDEP), baseado en Android Open Source Project (AOSP), integración con Microsoft Intune para a xestión empresarial, autenticación mediante Entra ID e Microsoft Hello for Business, ademais de controis físicos de privacidade como botóns para silenciar micrófonos.

Dous dispositivos de referencia

Microsoft acompañou a presentación da plataforma con dous deseños conceptuais destinados a servir como referencia para futuros fabricantes.
O primeiro é un dispositivo portátil con formato de acreditación ou tarxeta identificativa. Está pensado para profesionais que traballan en mobilidade, como persoal sanitario ou traballadores de primeira liña. Inclúe pantalla táctil, lector de pegadas para autenticación, cámara lateral, micrófonos de longo alcance, conectividade 5G e procesadores de Qualcomm orientados a dispositivos levables.
O segundo concepto é un dispositivo de sobremesa pensado para situar sobre a mesa de traballo. Conta cunha pantalla táctil, autenticación facial mediante Hello for Business, micrófonos e altofalantes integrados, conectividade sen fíos e procesadores IoT de MediaTek. Pode funcionar de forma autónoma, como complemento dun PC con Windows ou mesmo como cliente de Windows 365 ao conectarse a unha pantalla externa mediante USB-C.

Qualcomm e MediaTek, primeiros socios

Qualcomm e MediaTek converteranse nos primeiros socios de silicio da iniciativa. Qualcomm colabora co deseño portátil e destaca a súa experiencia en wearables e IA de baixo consumo, mentres que MediaTek participa no desenvolvemento do concepto de sobremesa aproveitando a súa presenza no ecosistema IoT.
Microsoft prevé ampliar progresivamente a colaboración con fabricantes de chips e construtores de dispositivos para crear novos formatos destinados a sectores como a sanidade, o comercio polo miúdo, os servizos financeiros, a industria ou a hostalaría.

Integración con Microsoft 365 e Copilot

A plataforma estará estreitamente ligada ao ecosistema Microsoft 365. Entre os servizos que poderán empregarse figuran Microsoft 365 Copilot, Researcher, Facilitator e un novo axente experimental denominado Priority Agent, pensado para identificar de forma dinámica os asuntos que requiren atención inmediata do usuario.
Tamén se están a explorar integracións con GitHub Copilot para desenvolvedores e con Dragon Copilot para profesionais sanitarios.
Os desenvolvedores poderán crear solucións para Project Solara mediante Copilot Studio, os axentes declarativos de Microsoft 365, o Microsoft 365 Agents SDK e o Microsoft Agent Framework.

Programa piloto

Microsoft confirmou que nos vindeiros meses iniciará probas privadas do ecosistema Project Solara con empresas como Best Buy, CVS Health, Levi’’s, Target e AccuWeather, entre outras.
Consideran que a redución dos custos asociados á creación de dispositivos especializados permitirá acelerar a innovación e abrir a porta a unha nova xeración de equipos deseñados arredor de axentes de IA en lugar de aplicacións tradicionais, nun escenario no que a intelixencia artificial non só transformará o software, senón tamén a propia natureza dos dispositivos informáticos.