Publican os resultados da III Enquisa a Blogueiros

A meirande parte dos blogues consultados son autobiográficos

O número 76 da revista Diálogos de la Comunicación (correspondente ós meses de xaneiro-abril de 2008) publica os resultados da III Enquisa a Blogueiros elaborada, entre outros, polo galego Fernando Garrido e a profesora da Universidade Carlos III de Madrid, Tíscar Lara, que debuxa o perfil do blogueiro hispano, definido coma un home (73%), mozo (o 51% ten entre 20 e 30 anos), con estudos universitarios (70%) e con máis de 5 anos de experiencia na Red (76%).
Esta nova entrega da enquisa procurou seguir os pasos de pasadas edicións, aínda que facendo máis rigorosa a súa metodoloxía, contando cunha plataforma tecnolóxica achegada pola empresa Netquest.

Blogger predomina entre as plataformas de publicación de blogs

No tocante á procedencia dos consultados, a meirande parte son de España (46%), seguidos por México (14%), Arxentina (9%) e Chile (8%). Entre os blogs destaca a temática autobiográfica, que supera ó resto tanto na lectura como na escritura, seguida por Medios e Xornalismo, Tecnoloxía e Humor.
Os blogueiros tamén dedican bastante tempo ás súas bitácoras (a metade dos consultados emprega 1 hora ou máis ó día ó seu blogue) aínda que o 42% admiten que teñen abandoado o seu espazo virtual temporalmente.
Sobre a opción tecnolóxica elixida, máis da metade dos blogueiros empregan Blogger como plataforma de publicación, e no caso español ata o 34% conta cun dominio de Internet de seu.
En conclusión, a enquisa presenta un achegamento ó perfil do blogueiro hispano, pero aínda conta con certas eivas, como a dificultade de estimar o sexo dos blogueiros (uns estudos falan dun 75% de homes, mentres que outros falan dun 54% de mulleres), agardándose que co tempo se vai pulindo o sistema para que permita a súa continuidade e contraste entre os datos recollidos en cada edición.