RTVE estrea a súa nova páxina web, que destaca pola súa canle de novas

Os presentadores dos informativos de TVE durante a presentación da nova web

Radio Televisión Española estreou hoxe a súa nova páxina web, que xa levaba un tempo en probas, e que destaca por incorporar unha gran canle de novas, así como permitir o acceso á carta da programación de televisión e radio do ente público.
A nova web permite o acceso en directo a Canal 24 Horas de TVE e a Radio 1, Radio 2, Radio 3, Radio 4, Radio 5, Radio Clásica e Radio Exterior, aínda que o acceso á carta dos programas de televisión dos últimos 7 días, así como á moitos programas de radio (dos que algún xa contaba dende hai tempo con podcast), melloran a dispoñibilidade dos contidos creados por RTVE.

O presidente da Corporación de RTVE, Luis Fernández, asegurou que o ente «dá outro paso na dirección que queremos, a dos novos tempos (..) Este é un medio dunha Corporación pública e que nos fai máis Corporación e tamén máis públicos. Este medio está no eixe do que queremos ser».
Para dar vida a este novo medio un equipo de 70 profesionais (dos que 40 son xornalistas) cubrirán en quendas as 24 horas do día, co que RTVE se intenta pór á altura das grandes televisións públicas en Europa.
Queda claro así que o portal do ente non busca ser só unha porta aos contidos emitidos por radio e televisión, senón que quere ser unha nova canle para chegar á audiencia, polo que a sección de novas cobra unha especial relevancia, xa que pretende ser a fiestra ao mundo para os españois, así como unha fiestra sobre España para o resto do mundo.
As novas publicadas poden seguirse mediante texto, imaxes, audio e vídeo, polo que os usuarios poden elixir o formato no que queren consumir a información. Tamén se inclúe os informativos emitidos por televisión no seu formato íntegro e nunha versión reducida de 4 minutos.
Os servizos iniciados con anterioridade, coma podcasts e blogs, continuarán a potenciarse, pero haberá outras novidades importantes nos vindeiros meses, pois se irán incorporando contidos audiovisuais á web para permitir o acceso público aos arquivos de TVE, de xeito que se poderán rememorar capítulos de series míticas ou outros contidos históricos que poden resultar de grande interese e utilidade.

Non esquecen Eurovisión

A web de RTVE facilítanos convidar a amigos para celebrar a participación de Rodolfo Chikilicuatre no Festival de Eurovisión

E o portal de RTVE non deixa de lado o fenómeno creado por Rodolfo Chikilicuatre, e dende a web oficial de Eurovisión 2008 invitan a acceder a un kit completo (e de balde) para decorar os fogares españois de cara á retransmisión do certame no que o Chiki Chiki deberá baterse con temas musicais de toda Europa.
O kit inclúe transfers para facer camisetas, formularios para facer porras/quinielas eurovisivas, bandeiriñas para os canapés, recortables co tupé, as lentes e a careta do Chikilicuatre, euroguirnaldas, carteis e o himno da Chikifesta.
Destaca a posibilidade de elaborar unha Chikiinvitación para animar aos nosos amigos a participar nunha chikifesta o día 24 pola noite. A invitación, personalizada coa nosa cara, tamén presenta a Rodolfo Chikilicuatre explicando cómo se vai o Chiki Chiki.