Resident Evil Requiem supera os 5 millóns de copias

Capcom confirma o éxito comercial de Resident Evil Requiem, a nova entrega principal da coñecida saga de terror e acción, que conseguiu vender máis de cinco millóns de copias apenas cinco días despois do seu lanzamento. A propia compañía nipoa celebrou o fito nas redes sociais cunha mensaxe dirixida aos seguidores da franquía: «Estamos profundamente agradecidos a máis de cinco millóns de persoas por xogar Resident Evil Requiem. A todo o mundo que segue apoiando a serie, moitas grazas».
Segundo explicou a editora nun comunicado recollido por diversos medios especializados, o título converteuse nun dos lanzamentos máis rápidos da historia recente da saga, superando o ritmo de vendas inicial de Resident Evil Village e tamén o dos populares remakes de Resident Evil 2 e Resident Evil 4.
Os primeiros datos de actividade tamén apuntan a unha forte acollida entre o público. Durante a fin de semana de estrea o xogo chegou a superar os 344.000 usuarios simultáneos en Steam, o que supón un récord para a franquía na tenda dixital de Valve.
O éxito de Resident Evil Requiem atribúese tamén a decisións de deseño orientadas aos seguidores da saga. O xogo recupera como protagonista ao popular Leon S. Kennedy e introduce unha nova personaxe, a axente do FBI Grace Ashcroft. A historia combina secuencias centradas en ambos personaxes e recupera escenarios emblemáticos da serie, como a cidade de Raccoon City, nunha mestura de terror de supervivencia e acción.
Outro detalle moi interesante ao redor de Captom é que, durante unha sesión de resultados financeiros, a compañía confirmou o pulo que ten o mercado dos xogos para PC, detallando que preto do 50 % das unidades que venden os seus títulos corresponden a ordenadores persoais. Indican que esta proporción leva anos medrando, tendencia que confían en que se manteña.