Runtime renóvase medrando en contidos

venres, 23 de xuño do 2023 Marcus Fernández

O ano pasado chegou a España Runtime, unha das novas plataformas audiovisuais de balde financiadas mediante publicidade que cada vez son máis frecuentes, para tentar facerse co público afeito á televisión en aberto. Para poder gozar dos contidos desta plataforma chega con empregar a súa aplicación para Android ou iOS en dispositivos móbiles, estando tamén presente en Apple TV, Fire TV, Google TV e as principais marcas de televisores.
O vindeiro día 26 esta plataforma transformarase en Runtime Service, medrando en contidos sumando 20 canles especializadas en cine e series de calidade, confiando así en ofrecer a mellor experiencia posible neste tipo de plataformas no mercado español.
Runtime conta na súa oferta con canles especializados en series españolas como Ana y los 7 e Curro Jiménez; con Cines Verdi TV e Cine Feel Good achegan máis dun cento de títulos de éxito do cine europeo e internacional; MyTime Movie Network ofrece tv movies protagonizada por mulleres; Vive Kanal D Drama é unha aposta polos dramas turcos que tanto éxito están a ter nos últimos anos; Corazón de TV Azteca fai o propio coas telenovelas mexicanas; os cativos poden gozar coas canles de Pocoyó e Los Pitufos; Cinema de TV Azteca traerá clásicos do cine mexicano (entre os que destaca a presenza de Cantinflas); e Film&Co centrarase no cine de ficción e documental independente español e internacional.
Estamos así ante unha renovación de marca para deixar constancia do incremento de contidos dunha plataforma que está a consolidarse cun modelo de negocio que parece chamado a coller o relevo da televisión tradicional, cando menos ao que se refire a contidos de ficción.

Vídeo no que anuncian a nova etapa de Runtime

PUBLICIDADE