Sae á luz a entrega número 12 do City of Heroes

Ncsoft Europe, o desenvolvedor e editor de xogos en liña, vén de anunciar hoxe o lanzamento do número 12 de City of Heroes, titulado Midnight Hour, a última entrega do coñecido xogo que nesta ocasión estrea un novo escuadrón así como novos arquetipos épicos de personaxes malvados, máis poderes e destrezas para os protagonistas e unha zona cen por cen inspirada na antiga Grecia e Roma.
Esta entrega número 12 de City of Heroes, creado e editado por Ncsoft, trae ó universo do xogo a xa coñecida Midnight Squad, unha organización clandestina de místicos, eruditos e magos que posúe un segredo que podería servir para derrotar ó grupo alieníxena inimigo, os Rikti. Os xogadores teñen, desta volta, a misión de axudar á Midnight Squad a revelar o segredo que podería salvar a Paragon City e as Rogue Isles dos seus perigosos asaltos.

Outra das novidades desta nova entrega son os arquetipos épicos dos inimigos, que agora, ó chegar ó nivel 50 desbloquearán dous novos: as Wolf Spiders (Arañas lobo) e as Blood Widows (Viúvas sanguentas), cada unha delas cunha serie de ataques específicos e mortais.
Asemade, o Midnight Hour introduce novos conxuntos de poderes que incrementarán os tipos de heroes e de inimigos que os xogadores poderán crear. Algúns destes poderes, antes só dispoñibles para os heroes, estarán agora dispoñibles para arquetipos de malvados e viceversa.
Os xogadores que estean dispostos meterse de cheo nas novas aventuras do City of Heroes teñen á súa disposición o pack da edición nas súas tendas habituais ou mediante descarga dixital nesta ligazón, onde se inclúen os xogos completos City of Heroes e City of Villains, así como outros obxectos exclusivos. O paquete inclúe o primeiro mes de xogo de balde e ten unha sola cota de subscrición de 12,99 euros ó mes.