Sae á venda a Xbox One X

martes, 7 de novembro do 2017 Marcus Fernández

Rematou a espera, e a nova consola de Microsoft chegou hoxe ás tendas, a Xbox One X, a que sen dúbida é a consola de videoxogos máis potente do mercado, que supón para moitos o inicio da era dos xogos en ultra alta definición (xa que a PlayStation 4 Pro non ten potencia dabondo para poder correr os 4K de xeito nativo de xeito xeral), o que terá un impacto bastante importante na industria, xa que nos vindeiros meses cando vexamos imaxes de xogos multiplataforma o máis habitual é que sexa a Xbox One X a máquina de referencia, por ofrecer un nivel de detalle sen precedentes nunha máquina dun prezo tan axustado (sae á venda a 499,99 euros, cando para conseguir un resultado semellante nun PC habería que gastar facilmente máis do dobre).
Aínda que é de esperar que os xogos futuros cheguen optimizados para Xbox One X, durante esta mesma semana teremos máis de 70 xogos anteriores optimizados para a nova máquina, de xeito que haberá actualizacións descargables para os mesmos que mellorarán os seus detalles gráficos no que nalgún caso parecerá case unha remasterización, pero en a necesidade de volver pasar por caixa para facerse coa versión mellorada.
Un detalle moi importante da Xbox One X é que é totalmente compatible con Xbox One e conta cunha crecente retrocompatibilidade con Xbox 360 e a Xbox orixinal, de xeito que sería a primeira consola de videoxogos con tal nivel de retrocompatibilidade, facendo que o seu catálogo de xogos sexa realmente inmenso.
Microsoft leva semanas presumindo do bo nivel de reservas que ten a Xbox One X, confiando en que a súa demanda sexa moi elevada de cara ao Nadal, polo que animan aos entusiastas a facerse coa nova consola antes de que sexa difícil de conseguir, algo que en España non debería acontecer, a que a plataforma de Microsoft non ten unha demanda moi elevada, pero en mercados como o norteamericano, onde a Xbox 360 foi un fenómeno de grande éxito, é moi probable que algúns xogadores reticentes a facerse coa Xbox One opten agora a mercar unha Xbox One X ao deixar claro que é a consola de referencia para a ultra alta definición (e inclúe lector de Blu-ray 4K, algo do que carece a PS4 Pro).
A Xbox One X ten bazas moi interesantes, como os xogos exclusivos da plataforma Xbox (con franquías de peso como Halo, Gears of War ou Forza Motorsport), o programa Xbox Play Anywhere (que permite mercar en dixital xogos de Microsoft de xeito que poden usarse tanto en Xbox One como en PC) e a posibilidade de acceder a EA Access e o máis novo servizo Xbox Game Pass, que un impresionante reclamo, a que por 9,99 euros/mes permite acceder a máis dun cento de xogos, no que podería considerarse como o Netflix dos videoxogos.

PUBLICIDADE