Sae á venda o primeiro Brain Training para Switch

A partir de hoxe está dispoñible nas tendas unha nova entrega da serie Brain Training do Dr. Kawashima para Nintendo Switch, o que supón unha grande transformación do xogo das consolas Nintendo DS e 3DS (con lapis dixitalizador), que nesta adaptación conserva moitos dos exercicios clásicos para manter unha mente activa e engade outros que tiren proveito das posibilidades da actual consola de Nintendo (concretamente aproveitan a cámara de infravermellos de movemento do Joy-Con dereito). Aínda que os exercicios poden resolverse directamente usando o dedo sobre a pantalla, tamén está dispoñible un lapis táctil que pode conseguirse ao mercar o xogo en soporte físico. O xogo en formato descargable véndese a un prezo de 26,99 euros, mentres que en formato físico pode atoparse por entre 29,90 e 39,90 euros.