Santiago contará cun centro loxístico robotizado para liberar o centro histórico de vehículos pesados
martes, 27 de xullo do 2021
En Santiago, un centro loxístico robotizado evitará a entrada de
vehículos pesados na cidade histórica. Trátase dunha das
iniciativas abeiradas á folla de ruta para converter Compostela
nunha Cidade Intelixente e
que foi presentada este 27 de xullo nos seus detalles polo presidente
do Consorcio e alcalde da cidade, Xosé A. Sánchez Bugallo, quen
sinalou que se pretende instaurar un modelo de reparto acorde coa
conservación do patrimonio e cunha mobilidade sustentábel e
eficiente.
Isto
será posíbel grazas a un centro robotizado que terá a súa sede
nun predio propiedade do Concello no barrio de Meixonfrío. A este
centro chegarán todas as mercadorías, que logo se repartirán ao
longo do día en varios vehículos eléctricos sustentábeis de
pequeno tamaño e vehículos sen condutor, cos que xa se van facer
probas nos vindeiros meses. Esta iniciativa ten un investimento
previsto de 7 millóns de euros. Bugallo fixo saber que con esta
iniciativa Santiago converteríase “na primeira cidade histórica
en acometer un proxecto desta envergadura”. Ao seu xuízo, “é
intolerábel que na cidade histórica entren vehículos de elevada
tonelaxe porque afecta aos pavimentos, en ocasións tamén producen
danos nos propios inmóbeis e ofrécese unha mala imaxe da cidade”.