Santillana estrea unha enciclopedia participativa

Resulta abraiante que unha editorial tradicional como Santillana aposte polas redes sociais, pero iso parece facer coa súa nova iniciativa, Kalipedia, que pretende ser unha enciclopedia en liña participativa que reparte os seus contidos en materias temáticas (artes, ciencias naturais, xeografía, historia, enxeñería, lingua e literatura, matemáticas e pensamento, relixión e cultura) sen esquecer o acceso a material multimedia.
Deste xeito, alumnos, profesores e pais poderán empregar esta ferramenta como apoio no proceso educativo, pretendendo ser tamén unha fonte de información fiable e de calidade, adaptada á formación de estudantes de ensino secundario.
Os usuarios rexistrados nesta nova plataforma tamén poden compartir información, interactuar e participar nunha sección chamada Interkambiador. Esta sección será a que máis chame á participación en comunidade, e permitirá o uso de blogs multiusuario, foros, grupos de intereses comúns, avatares personalizados, cualificación dos contidos propios, retos, concursos... en definitiva, que é un servizo colaborativo que busca que os seus usuarios desexen estar marKados para incorporarse a esta comunidade virtual.