Sevilla anuncia en FITUR un novo evento para gamers

A Feira Internacional de Turismo que se celebra no recinto de IFEMA en Madrid foi o escenario escollido para a presentación do GEM Awards, un novo evento da industria dos videoxogos que se desenvolverá entre os días 24 e 27 de abril en FIBES II (Sevilla) e do que deron conta o alcalde de Sevilla, José Luis Sanz, e a cofundadora do evento e directora xeral de DFW Creative (axencia de márketing de Singapur), Charina Widjaja.
Falamos dunha feira de videoxogos no que se desenvolverán torneos e sesións educativas, así como tamén contará con zonas de xogo libre e establecementos comerciais, aínda que o seu prato forte pretenden que sexa a gala dos GEM Awards, que se celebrará na noite do sábado 26 de abril e estará presentada polo creador de contidos Míster Jägger, e poderá seguirse en directo a través da Rede. Estes premios recoñecerán os mellores xogos do ano a través das votacións da propia comunidade de xogadores.
Para captar a atención do público, o evento contará coa colaboración de máis de 45 creadores de contido e influentes como Abipower, Creativo en Japón, Salva Fernández e Zorman.
Cómpre salientar que este evento que presume de ser «por e para os gamers» está a recibir críticas precisamente da comunidade de xogadores por unha política de comunicación tan abstracta, na que non se está a concretar realmente en que consiste nin o propio evento nin os premios, dando a impresión de que estamos ante un evento de videoxogos máis dos que se reparten na xeografía española, pero cunha identidade moi confusa (xa que se anuncia como uns premios).