Steam permitirá gozar dos xogos de ordenador dende o móbil, a tableta ou o televisor

ata o momento Steam Link era un accesorio que facilitaba o xogo remoto, ou sexa, que permitía, por exemplo, xogar ao ordenador dende o televisor

A plataforma de xogos para ordenador de Valve, Steam, está a preparar o lanzamento dun par de aplicacións realmente interesantes, que estenderán a plataforma a novos dispositivos, sendo especialmente rechamante a aplicación de Steam Link, que ten previsto o seu lanzamento para a semana do 21 de maio, e que permitirá que os usuarios poidan gozar dos xogos da súa colección de Steam nos seus dispositivos con Android (teléfonos, tabletas e televisores) ou iOS (iPhone, iPad e Apple TV) sempre que teñan unha conexión local de alta velocidade co ordenador que moverá os xogos (sexa PC ou Mac). A aplicación será compatible con mandos como o Steam Controller ou os compatibles con MFI.
A outra aplicación, que chegará a finais do verán, será Steam Video, que pretende achegar os centos de películas e programas dispoñibles en Steam a dispositivos con Android ou iOS, facilitando a reprodución dos contidos tanto mediante streaming como fóra de liña.