Steam renova o seu chat

Non hai dúbida en que Steam é a plataforma de videoxogos de referencia en ordenadores persoais, pero nos últimos meses descoidaron as demandas dos usuarios, de xeito que a aplicación de chat Discord conseguiu imporse como complemento ao xogo en PC. A reacción de Valve foi preparar un novo chat para Steam, con características de texto e voz, que funciona tanto vía web como na súa aplicación de escritorio, e que tras estar funcionando en probas dende o 12 de xuño, por fin está dispoñible para todos os usuarios de forma oficial.
O novo chat de Steam permite xestionar de xeito máis flexible a nosa listaxe de amigos (organizándoos en favoritos, por xogos, por grupos...); facilita os chats en grupo; acepta elementos multimedia nas conversas (como imaxes GIF animadas, vídeos, chíos...); permite engadir amigos a unha conversa cunha simple operación de arrastrar e soltar; deixa gardar as conversas interesantes para poder retomalas de xeito doado onde quedaron; conta con chats de grupo persistentes (para facilitar a conexión cun grupo de xente cando se vaia iniciar unha partida); permite engadir canles aos grupos; para facilitar a participación en conversa é posible xerar ligazóns con invitacións de xeito que outro usuario pode sumarse a través do cliente de Steam ou dun navegador web; e conta cun chat de voz totalmente renovado (baseándose agora en WebRTC, e mantendo os enderezos IP dos usuarios en privado ao pasar as comunicacións polos servidores de Valve).
Queda agora por ver se os usuarios de Steam sucumbirán ante esta renovada proposta, ou manterán a súa fidelidade a Discord como ferramenta de comunicación durante as súas sesións de xogo.