Tecnólogos e investigadores en computación debaten en Braga o futuro destas tecnoloxías
mércores, 26 de maio do 2010
Baixo o lema "Bridging
the gap between European e-Science and Iberian America”, IBERGRID’2010, a Iberian Grid
Infrastructure Conference, iniciou hoxe mesmo a súa cuarta edición na
Universidade de Minho, en Braga, reunindo a máis de 150 expertos en computación
procedentes de España e Portugal.
Esta conferencia, nacida en 2007 no marco do acordo
bilateral para a Ciencia e a Tecnoloxía entre os gobernos dos devanditos
países, tén como principal obxectivo ser un foro de discusión dos avances no
desenvolvemento da rede de infraestruturas, tecnoloxías e aplicacións na
Península Ibérica e en América Latina, impulsando a construcción dunha
infraestrutura Ibérica común de e-Ciencia que fomente a cooperación nos
dominios da computación en grid e da
super-computación.
Durante a Sesión Plenaria da mesma, o presidente do LIP
(Laboratório de Instrumentaçao e Física Experimental de Partículas de Lisboa),
Gaspar Barreira, anunciou o compromiso de mobilidade de investigadores entre
España e Portugal, confirmado polos ministerios de ambos os dous países, dende
onde apuntan que “a convocatoria do
Programa de Mobilidade de investigadores para Proxectos de e-Ciencia abrirase
do 1 ao 21 de xullo”.
Este Protocolo de Movilidade significa a posibilidade de
recibir estancias en centros de ambos países por parte de estudantes e
profesores en periodos curtos de 2
a 4 semanas, para desenvolver accións e proxectos
específicos previamente acordados.
En palabras de Javier García Tobío, director xerente do
CESGA e un dos promotores da conferencia dende a súa orixe: “a rede IBERGRID pretende crear un espazo
único Ibérico de investigación. As máquinas xa están interconectadas e ata o
momento, esta entidade só intercambiaba servizos de máquinas; a partir de agora
intercambiará tamén o coñecemento a través das persoas”.
O CESGA, que participa neste proxecto de unión
científico-tecnolóxica entre España e Portugal facilitando as súas
infraestruturas da Rede de Ciencia e
Tecnoloxía de Galicia, organizará para o evento as II Xornadas de Supercomputación, un Workshop de HPC nacido ao amparo da IBERGRID pero independente da
mesma, na que se fará unha análise en profundidade da supercomputación
española. Deste xeito, o xoves 27 participarán nelas todos os centros de
Supercomputación Nacionais, en dúas sesións: unha de centros na que se falará
de políticas de acceso e novidades do último ano e outra de usuarios na que se
presentarán por cada centro os retos e proxectos máis emblemáticos levados a
cabo no último ano.
Asemade, o Portal de Métricas e o Portal de Accounting,
ambos os dous proxectos de Middleware desenvolvidos no CESGA para EGEE e
actualmente empregados no Grid do LHC do Cern, tamén se presentarán nestas
xornadas, onde o noso Centro de Supercomputación é un dos organizadores e
participantes máis activos.
IBERGRID continúa na Universidade do Minho ata o vindeiro día
28 de maio.