The Last of Us inspira un mando de edición limitada

A serie de xogos de The Last of Us volve estar de máxima actualidade, co lanzamento da segunda tempada da súa adaptación televisiva en Max programado para o vindeiro 13 de abril e coa chegada a PC de The Last of Us Parte II Remastered o 3 de abril. E Sony non quere deixar pasar a oportunidade para pór á venda un mando sen fíos DualSense para PlayStation 5 inspirado nas dúas partes do xogo, que estará dispoñible en unidades limitadas a partir do 10 de abril a un prezo de 84,99 euros, aínda que as reservas do produto abriranse xa o vindeiro 14 de marzo ás 10:00.
Este mando de edición limitada presenta un deseño en cor branca e negra na que figuran as iconas de trofeos brillantes impresos na superficie, homenaxeando momentos clave, personaxes e acontecementos das dúas partes da célebre aventura creada por Naughty Dog.
Destacan neste curioso deseño o logotipo dos Vagalumes (Luciérnagas) da Parte 1, mentres que as iconas da couza e do lobo representan as vidas interconectadas de Ellie e Abby na Parte 2.