O terror de Alien chega aos móbiles

Tras o éxito de Alien: Isolation, que bebía directamente dos filmes de Ridley Scott á hora de transmitir o ambiente de terror e supervivencia propio da ameaza dos xenomorfos, recuperouse o interese da franquía cinematográfica como escenario para un survival horror, de aí que agora poidamos dar a benvida a Alien: Blackout, un xogo dispoñible para iOS e para Android, no que haberá que sobrevivir a bordo dunha estación espacial avariada de Weyland-Yutani na que un depredador alieníxena persegue á tripulación.
O feito de estarmos ante un xogo móbil marca moitas distancias con Isolation, pero Blackout ten igualmente unha interesante proposta, na que a través de 7 niveis arrepiantes haberá que guiar remotamente á tripulación para realizar tarefas desafiantes e empregando só os sistemas de emerxencia da estación, de xeito que a incerteza e o imprevisible poden levarnos ao éxito ou ao fracaso.
Este episodio da franquía de Alien continúa a saga de Amanda Ripley, filla de Ellen Ripley (protagonista de Alien: o oitavo pasaxeiro), fuxindo da acción e convidándonos a xestionar un subministro de enerxía limitado, para traballar cun mapa holográfico, cámaras de vixilancia e un detector de movemento para protexer á tripulación do mortífero xenomorfo. Unha aventura especialmente recomendada para os fieis seguidores desta franquía cinematográfica que tamén ten unha longa traxectoria no mundo dos videoxogos (onde tocou xéneros moi diferentes).