Trasno presenta Ubuntu 12.10 co galego no posto 14 dos idiomas máis completos
luns, 22 de outubro do 2012
A nosa lingua, grazas ao traballo de
asociacións como Trasno, está presente nas principais alternativas
do ámbito da programación aberta aos sistemas operativos pechados.
Unha destas grandes alternativas, completa e competitiva, é a achega
de Ubuntu, distribución de software libre que está nestes días de
actualidade polo lanzamento-presentación dun ambicioso
desenvolvemento: a súa versión 12.10, definitiva. Pois ben, segundo
nos conta a asociación Trasno, esta nova versión ten boas novas
para o colectivo de usuarias e usuarios da nosa terra. De feito, a
comunidade de galeguización de Ubuntu, o Ubuntu Galician Team,
integrada en boa medida por membros de Trasno, acadou o 14 lugar como
idioma máis completo na devandita distribución.
Isto foi posíbel, informan do
colectivo galego, “grazas ao esforzo constante dos
voluntarios-usuarios, de longo prazo e sen máis
axudas que as achegas voluntarias dos seus membros”. O traballo
(que non está completo aínda e que, por este motivo, precisa de
máis colaboradoras/es), permitiranos ter ao alcance da man a achega
definitiva de Ubuntu 12.10, que promete ser líder na clasificación
de sistemas operativos libres tal e como agoira a súa recente
traxetoria en beta, baixo o nome de Quantal Quetzal, e que incluíu
novidades como o kernel Linux 3.5.4, soporte para Python 3.2, a
substitución do Unity 2D polo Unity 6.6 (que acubilla novos lens
para as redes sociais, procuras en Amazon, etc), ou unha ferramenta
(Unity Preview) que achega vistas previas da información de cada
programa.