TurisTIC impulsará dende Vilagarcía a transformación tecnolóxica do noso sector turístico
mércores, 21 de xullo do 2021
Este
21 de xullo celebrouse
en Vilagarcía a presentación do futuro centro de fabricación
avanzada Galicia TurisTIC. Na cita participou o conselleiro de
Economía, quen salientou que TurisTIC funcionará “como un polo
tecnolóxico para impulsar a dixitalización do sector turístico e
contribuír á creación de emprego de calidade no Salnés e en
Galicia, así como á retención de talento”. O seu obxectivo
específico será fomentar a creación de produtos e empresas de
alicerce tecnolóxico na cadea de valor do eido turístico galego.
A
iniciativa forma parte dos sete centros de fabricación avanzada que
está a impulsar o Goberno galego grazas á colaboración
público-privada a través dun investimento de case 27 M€, contía
da cal a Xunta achega preto do 76%. O obxectivo é potenciar sectores
como o turismo, o agroalimentario, o loxístico, o biotecnolóxico ou
o das TIC (Tecnoloxías da Información e a Comunicación) para
ofrecer toda unha infraestrutura de recursos e servizos tecnolóxicos
ás pemes galegas.
Volvendo
a TurisTIC, trátase dunha iniciativa impulsada con investimento
público (400.000 euros) que xorde do traballo conxunto entre
administracións autonómica e local e empresas e entidades como o
Clúster de Turismo de Galicia e o de TIC de Galicia; Turismo de
Galicia; as Cámaras de Comercio de Pontevedra, Vigo e Vilagarcía; a
Autoridade Portuaria de Vilagarcía; e a Mancomunidade do Salnés.
Nas
súas instalacións, que abranguen 275 m², Galicia TurisTIC dará
acubillo a tres laboratorios (de Intelixencia Artificial e análise
de información a gran escala —big data—; de dispositivos
intelixentes; e de Realidade Virtual e Aumentada); unha área de
formación no eido tecnolóxico; unha área de demostración para
clientes públicos e privados; e outra de emprendemento para novas
firmas innovadoras.