UCGAL advirte que o ERE de Vodafone afondará nunha perda de calidade
luns, 21 de xaneiro do 2019
A
Unión
de Consumidores de Galicia (UCGAL) vén de emitir un comunicado
no que se alerta das consecuencias que poderá ter
o ERE anunciado os días pasados pola operadora de Vodafone, un
proceso de regulación de emprego que implicará importantes
prexuízos para os traballadores e traballadores da firma (a medida
podería afectar a 1.200 persoas) pero,
tamén, en palabras de UCGAL, para a comunidade de usuarios dos seus
servizos. No comunicado, asinado tamén pola Asociación de
Internautas (AI) e a Asociación Pro Dereitos Civís, Económicos e
Sociais (ADECES), faise saber que esta caída na calidade do servizo
da que se advirte xa se detectou en 2018 a través de diversos
estudos. Daquela, sinálase, a puntuación nos parámetros xa
rexistraba niveis mínimos entre os operadores de telecomunicacións.
Para
estas asociacións é “plausíbel que o deterioro que vén
rexistrando o operador teña a súa orixe nos sucesivos ERE
acometidos desde 2013”, ano no que afectou ao 21% do persoal (900
de 4.300 traballadores). A isto, engaden, cómpre engadir a fusión
con Ono, en 2015, que derivou noutro proceso de redución do equipo
laboral que afectou ao 16% do total dos empregados.
As
entidades de consumidores lembran que o expediente anunciado afectará
case a unha cuarta parte do persoal da compañía de
telecomunicacións, e que este expediente, unido aos anteriores, “é
imposíbel que garanta uns niveis de calidade de servizos e atención
ao cliente apropiados”.
As
asociación tamén recordan que en 2018 diferentes estudos de seu
reflectiron “baixos índices de calidade que este ano irán
seguramente a máis”. Nun dos últimos informes publicados (finais
de 2018), elaborado por ADECES, avalíase a atención ao cliente, un
dos parámetros “máis afectados polos sucesivos recortes” e que
“probabelmente agudizará o seu deterioro logo do ERE de 2019”.
Neste estudo Vodafone obtiña unha puntuación media total de 5,39
puntos. Isto, explican, será aplicábel a outros eidos de
actividade, como a asistencia técnica e a atención comercial, nos
que Vodafone ocupou os últimos postos no ano que vimos de deixar
atrás. Semellante tónica acadouse na investigación lanzada por AI
no segundo semestre de 2018 sobre banda larga. Este informe puxo de
manifesto que Vofadone “obtivo a peor puntuación posíbel en
calidade de Internet móbil, só 4,13 puntos”.