Un emulador permite xogar completamente a Super Mario Odyssey

Para recuperar clásicos dos videoxogos, tanto de consola como de recreativa, tiveron un grande pulo os emuladores para ordenadores persoais, que conseguían imitar o funcionamento de vellas máquinas nun PC para así poder gozar comodamente de vellos xogos sen ter que conservar o seu hardware orixinal. Pero a potencia deste software consegue que en moitos casos poidan achegarse a equipos moi lonxe de considerarse clásicos, de xeito que nos últimos anos vimos como especialmente Nintendo podía considerarse case unha vítima ao ser posible gozar de moitos dos seus xogos modernos emulando as súas consolas, o que está a pasar coa Nintendo Switch, que podería ter serios problemas con Yuzu, un emulador que está a avanzar a pasos axigantados.
As últimas versións de Yuzu, emulador de código aberto para Windows, macOS e Linux, terían solucionado certos atrancos, e como sorpresa de Halloween anunciaron que xa permitía xogar de principio a fin o xogo Super Mario Odyssey, un dos principais referentes da Nintendo Switch.
Detrás do proxecto de Yuzu están os creadores de Citra, un emulador de código aberto da Nintendo 3DS, capaz de correr a meirande parte dos xogos da consola portátil de Nintendo. En ambos casos son proxectos que se moven nunha liña moi fina que separa a preservación do patrimonio dixital e a piratería, especialmente por facilitar a reprodución sen licenza de videoxogos actuais.