Un modificador da Nintendo Switch terá que pagar 2 millóns de dólares de indemnización

A Xustiza dos Estados Unidos vén de ditar unha sentenza contundente a favor de Nintendo of America contra Ryan Michael Daly, coñecido polo nome comercial Modded Hardware, tras un acordo entre as partes para pechar o caso. O tribunal federal de Seattle recoñeceu que Daly comercializou dispositivos e servizos destinados a vulnerar as medidas de protección tecnolóxica da Nintendo Switch, facilitando así a copia e execución de xogos pirateados a gran escala.
Segundo a documentación xudicial, o demandado distribuíu dispositivos como o chamado MIG Switch, que permite executar copias non autorizadas de xogos, e o MIG Dumper, deseñado para copiar cartuchos en discos duros. Ademais, comercializou modchips, consolas manipuladas con este hardware e incluso ofrecía servizos para instalar estas modificacións en consolas de clientes, chegando tamén a distribuír copias ilegais de videoxogos da compañía nipoa.
O tribunal estableceu unha indemnización de dous millóns de dólares a favor de Nintendo e impuxo unha orde que prohibe ao demandado fabricar, vender, distribuír ou promover calquera dispositivo ou servizo que permita a pirataría en consolas. Tamén se lle prohibe manter dominios web como moddedhardware.com e deberá entregar a Nintendo todos os equipos e materiais relacionados con estas prácticas. A resolución establece, ademais, que calquera incumprimento da orde poderá derivar en sancións adicionais, incluíndo multas e medidas punitivas.