Un novo xogo amplía o universo de Elden Ring

Hoxe é a data na que se fai realidade Elden Ring Nightreign, un xogo spin-off do aclamado Elden Ring de FromSoftware que vendeu máis de 28,6 millóns de copias mundialmente. Aínda que o xogo ten complicado repetir o éxito ao non ser unha secuela, senón un xogo independente de acción, supervivencia e cooperativo multixogador ambientado nunha nova terra dentro do universo de Elden Ring, o pulo desta marca está a funcionarlle moi ben, e nas súas primeiras horas en Steam conseguiu concentrar a 313.593 xogadores simultáneos.
O xogo, dispoñible para PC, PS4, PS5, Xbox One e Xbox Series X|S, somerxe aos xogadores en combates cooperativo PvE contra un contorno hostil. Xuntando forzas en escuadróns de tres xogadores (ou en solitario) haberá que sobrevivir a un ciclo de tres días e noites, tomando decisións rápidas sobre combate e exploración ao longo dun mapa en constante cambio, co obxectivo de fornecerse dabondo como para derrotar a temibles xefes ao remate de cada día.
Os xogadores elixen entre oito Azoutes da Noite diferentes, con cadansúas armas e habilidades, e no terceiro día de supervivencia deberán enfrontarse a un dos Señores da Noite, xefes totalmente novos con desafíos inéditos que superar.
Estamos ante un título que resulta polémico, xa que os seareiros de FromSoftware están afeitos a experiencias en solitario, polo que a fórmula cooperativa non resulta familiar e tampouco está especialmente ben desenvolvida (carece dun sistema nativo de comunicación entre os xogadores). Pero aínda que os comezos de Elden Ring Nightreign poidan ser complicados, os usuarios parecen confiar de xeito xeral en FromSoftware, polo que dan un voto de confianza a un título que podería mellorar moito na súa maduración durante os vindeiros meses.