Un videoxogo presenta unha mirada crítica dos establecementos de comida rápida

Os xogos na Internet poden servir para algo máis que entreter, e así non faltan os xogos educativos ou para desenvolver as facultades mentais, pero xente coma Paolo Pedercini cren que se pode empregar este tipo de produtos para facer crítica social, polo que lanzou á Rede o McDonald’s Videogame, que é un simulador de McDonald’s que permite controlar todo o proceso da compañía, que vai dende o sector primario ata o usuario final, co que pretende amosar cómo é o negocio da comida rápida.
Pedercini coida que grazas a este xogo se poidan descubrir «tódolos segredos» que fan que McDonald’s sexa «unha das compañías máis grandes do mundo». Critican deste xeito a destrución dos bosques tropicais, a perda da sustentabilidade do terceiro mundo, a desertificación, a precarización das condicións laborais e moitas outras consecuencias do modelo de negocio deste tipo de establecemento.
Aparte de xogar na web, o McDonald’s Videogame permite a súa descarga para Windows e Mac, de xeito que se pode xogar sen estar conectado á Internet.