Un xogo bélico propón a defensa dos EE.UU. en 1953 fronte a un ataque nazi

Turning Point: Fall of Liberty é o último xogo de Spark Unlimited creado en colaboración con Codemasters, que nos sitúa nun contorno bélico pouco usual: New York en 1953 fronte o ataque das tropas xermanas que veñen de gañar a II Guerra Mundial (pois neste mundo virtual non se xuntaron as Forzas Aliadas fronte o inimigo común nazi).
Tampouco é habitual o enfoque deste xogo, que ten como protagonista a un traballador da construción estadounidense o que se ten que defender sen armas nin formación militar dos ataques que sufre a súa cidade, polo que estariamos ante un peculiar sistema de loita de guerrillas.

Turning Point resulta rechamante pola súa ambientación, de xeito que podemos ver impactantes imaxes como a Casa Branca norteamericana con bandeiras nazis, ou queimas de libros no medio das rúas, supondo todo un reto para o xogador que se atopa no bando máis débil da loita.
O xogo comezará a venderse a finais de ano para as plataformas PS3, Xbox 360 e PC.