Unha docuserie explora o abuso dos móbiles e as redes sociais por parte da mocidade

O vindeiro mércores ás 22:55 a canle autonómica ETB2 estrea a serie documental Generación Click, producida por Shine Iberia (compañía detrás de Xeración Porno que actualmente podemos ver en AGalega), e que amosa as ameazas e desafíos aos que se enfrontan os mozos cando se conectan á Internet e ofrece solucións para evitar que estraguen a súa mocidade.
A serie documental explora de xeito exhaustivo as consecuencias do abuso de móbiles e redes sociais por parte dos adolescentes, como pode ser a ansiedade, a depresión, os trastornos alimentarios, a obsesión pola cirurxía estética, as adiccións, as apostas, a agresividade, o ciberacoso, o insomnio, o fracaso escolar e incluso o suicidio (convertida na principal causa de morte entre a mocidade).
Generación Click contará con testemuños de proxenitores e fillos, contando en primeira persoa e sen cancelas as súas experiencias. Tamén falarán expertos como psicólogos, médicos e membros dos Corpos e Forzas de Seguridade do Estado, así como antigos adictos e vítimas.
A primeira entrega desta serie está dispoñible para ver en liña, aínda que unicamente dobrada ao éuscaro, pero entendemos que chegará proximamente á TVG e a AGalega.gal.