Unidade Moteira crea unha web para protestar polos novos impostos por emisións de CO₂

As asociacións de moteiros englobadas baixo o nome de Unidade Moteira, veñen de pór en funcionamento unha nova páxina web que ten como principal obxectivo amosar a desconformidade do colectivo ante a intención do Goberno de establecer un novo imposto de matriculación especial para as motos.
Este sitio, que xa leva rexistradas máis de 1.500 adhesións, pretende ser un centro no que se concentre a oposición á nova proposta de lei anunciada polo Goberno e que contempla a posta en marcha dun imposto de matriculación especial para motocicletas, asociado ás emisións de CO₂ dos vehículos.
Este novo imposto de matriculación para motocicletas contempla que as motos que emitan menos de 80 gramos de CO₂ por quilómetro quedarán exentas de pago, mentres que as que emitan entre 80 e 100 gramos pagarán o 4,75 por cento; as que teñan unhas emisións de entre 100 e 120 gramos afrontarán un tipo do 9,75 por cento e, finalmente, as motos con emisións de máis de 120 gramos por quilómetro ou con 100 cabalos de potencia o máis, asumirán o tipo máximo do 14,75 por cento.
Unidade Moteira reclama a retirada “deste ilóxico proxecto de lei que discrimina aos vehículos de dúas rodas ao establecer un baremo de tributación por emisións de CO₂ máis alto ás motocicletas de potencia igual ou superior a 100 cabalos, independentemente do seu nivel de emisións”.