Vilagarcía acollerá un scape room para concienciar aos adolescentes sobre o uso responsable de Internet

A Concellería de Servizos Sociais de Vilagarcía organiza este mes unha actividade para concienciar aos adolescentes sobre o uso responsable de Internet e as redes sociais. Será a proposta de lecer Desafío Dixital: apaga e xoga, un scape room que se celebrará o 12 de decembro na praza da Peixería. A actividade está dirixida a rapaces e rapazas de entre 12 e 16 anos do Concello de Vilagarcía.
O prazo de inscrición remata o 8 de decembro. As familias interesadas en participar deberán presentar unha instancia xeral no Concello ou facer o mesmo trámite pola sede electrónica de Vilagarcía.
Con esta acción, búscase “crear un espazo educativo, preventivo e participativo no que a mocidade reflexione sobre o uso que fan da tecnoloxía, así coma recoñecer os riscos asociados ao abuso dixital e adquirir as ferramentas prácticas necesarias para mellorar o seu benestar emocional e social na Rede”, explicou o Concello.
A actividade está organizada en dúas quendas: para nenos de 12 a 14 anos (máximo 20 persoas) de 16:30h-18:00h; e de 14 a 16 anos (máximo 20 persoas) de 18:30h- 20:00h. A actividade será impartida por catro educadoras sociais do Concello, que recibirán aos participantes, dividiranos en grupos e explicaranlle o funcionamento. Será un circuíto conformado por seis probas, por exemplo, Alerta Red Flag, que consistirá en identificar comportamentos nocivos na rede. O grupo que consiga realizar todas as probas no menor tempo posible recibirá un premio.
Para calquera dúbida, as persoas interesadas poden dirixirse directamente ao Centro de Servizos Sociais municipal.