Virtua Fighter 5 chegará a tempo para o desembarco da PS3 en Europa

O Nadal europeo non contará coa PS3 nas tendas, pero a súa chegada no mes de marzo será moi agardada grazas ós xogos que están a preparar para a nova consola, de xeito que cando chegue ó noso mercado xa estará nas tendas o Virtua Fighter 5, que se venderá a partires do 20 de febreiro, e que levará ós xogos de loita para consola un paso máis adiante, no que será unha conversión moi fiel da máquina recreativa (que empregaba a placa Lindbergh de Sega).
O novo xogo terá un total de 17 personaxes (incluíndo algúns novos coma Eileen ou El Blaze) e así, ó igual que o Gears of War é un xogo imprescindible para os posuidores dunha Xbox 360, o Virtual Fighter 5 quere ser o seu homólogo para a PS3, aínda que chegará co apoio dos seguidores desta saga de xogos de loita para ser un éxito absoluto.

O usuario pode elixir entre 17 personaxes para competir neste xogo de loita

Esta nova entrega aproveita a alta definición da nova consola de Sony, que amosa detalles que chegan ata as engurras dos personaxes do xogo, polo que non parece arriscado afirmar que este produto de Sega contará co beneplácito tanto da crítica coma do público.