Vitae Consultores amósanos como protexer o noso posto de traballo e a nosa empresa de ameazas TI
martes, 22 de marzo do 2022
Agora
máis que nunca é preciso redobrar esforzos en ciberseguridade,
tanto dende as institucións, entidades e corporacións directamente
implicadas como a nivel de usuario na nosa empresa ou no noso fogar,
contribuíndo deste xeito, co noso gran de area, a garantir unha Rede
segura. E dicimos o de “agora” porque a crise pandémica e a
guerra perpetrada por Rusia non fixeron máis que agravar a situación
presente. Axudarnos a crear ambientes dixitais protexidos e fiábeis
na empresa é o obxectivo
da segunda edición do Curso Introdución á Ciberseguridade TI no
Posto de Traballo, organizado por Vitae Consultores. Serán 15
horas de formación, a desenvolver en formato de aula virtual os días
20, 21, 25, 27 e 28 de abril.
Segundo
explica a consultora, “este curso aportará os coñecementos e os
recursos precisos ao traballador para que coñeza o seu papel e se
atope totalmente concienciado coa necesidade de ser parte activa da
seguridade TI da súa empresa, integrándose nos esquemas de
seguridade que se atopen despregados, e, por outra banda, tamén á
hora de dar cumprimento con diferentes normas legais en seguridade
TI, así como a automatización das boas prácticas á hora de
manexar activos da súa organización”.
En
definitiva, o curso “achegaranos os recursos para protexer o noso
posto de traballo de ameazas á seguridade TI, dende o uso axeitado
das ferramentas tecnolóxicas e de xestión ás normativas legais en
materia de protección dixital”.
A
actividade formativa está dirixida a profesionais que empreguen as
Tecnoloxías da Información no seu día a día, de calquera sector
ou área. Non é preciso ter ningún coñecemento en ciberseguridade
ou seguridade TI para realizalo.
A
persoa encargada de impartir os contidos será Gonzalo Sotelo,
responsábel do equipo de Investigación Tecnolóxica da Guardia
Civil de Pontevedra. Sotelo é diplomado en Policía Xudicial pola
Universidade Complutense e en Investigación Tecnolóxica pola Garda
Civil, Europol e Interpol. É formador en cursos relativos á
seguridade informática e a investigación tecnolóxica. A día de
hoxe é garda civil e exerce como responsábel do devandito equipo
pontevedrés dende a súa creación en 2003.