Viveiro lanza app de turismo cunha manchea de funcionalidades
luns, 23 de xullo do 2018
O
Concello de Viveiro vén de dar un chimpo en turismo pola vía
tecnolóxica. Estamos
a falar da aplicación móbil habilitada e lanzada polo Goberno local
para servir de complemento ideal á web turística lanzada hai dous
anos (www.viveiroturismo.com)
co obxectivo de atraer visitantes e facer comunidade arredor dos
moitos e variados atractivos do termo municipal lucense.
Segundo
informou o Concello, a app salienta polo seu carácter visual,
polo seu contido gráfico extra e por unha manchea de funcións ao
servizo do visitante, o turista e, tamén a propia veciñanza de
Viveiro. A aplicación está dispoñíbel xa para dispositivos con
iOS e con Android.
Nun
plano máis detallado, a ferramenta acubilla unha manchea de
posibilidades, como por exemplo un bloc de notas, información sobre
lugares de interese que visitar ou onde durmir, un mapa activo, un
apartado de actualidade, unha relación de eventos, unha canle de
incidencias e un escaner QR, entre outras funcionalidades. Asemade, a
aplicación móbil conta cunha ferramenta que permite o envío de
notificacións push, programadas tanto en tempo como por
xeolocalización, que permite aos usuarios estaren conectados con
todos os que teñan instalada a app no seu dispositivo móbil
e mantelos informados “dunha maneira instantánea e actualizada”.