Vodafone levará o fútbol en 4K aos bares

Vodafone foi a primeira compañía en anunciar a súa oferta converxente con todo o fútbol para locais de hostalaría, e agora dende o diario Expansión adiantan que o operador garda un as baixo a manga para facer máis atractivo o servizo: achegar contidos en ultra alta definición e financiar televisores compatibles.
A partires da vindeira semana Vodafone ofrecerá cada xornada un partido de Liga e outro de Champion League en 4K (equivalente a 4 televisores Full HD) de xeito que achégase unha calidade moi superior ao que estamos afeitos, o que pode resultar moi atractivo para os espectadores e decisivo á hora de decidir o local ao que acudir a ver un encontro e, aínda que tamén se espera que o resto de operadores ofreza este tipo de contidos, dende Vodafone xa seleccionaron o novo descodificador que permitirá recibir os servizos en 4K, que pode adaptarse ás instalacións de ADSL, cable e fibra óptica do operador, e que ofrecerase en aluguer nas vindeiras semanas. Dado que a recepción do sinal en UHD non serve de nada se non contamos cun televisor con tal definición no seu panel, Vodafone financiará a compra de televisores LG de 55 polgadas, valorados en 700 euros, que poderán pagarse en 24 meses.
Adicionalmente Vodafone tamén prevé iniciar accións específicas de marketing, que inclúen unha páxina web para axudar aos bares a realizar a promoción dos partidos.