Wuaki.tv estréase na PlayStation 3

As plataformas de vídeo baixo demanda a través da Internet están a emerxer con forza, e aínda que en España non temos nada comparable a Netflix, o máis parecido podería ser Wuaki.tv, servizo que está dispoñible dende o ordenador, para certos Smart TV, a través de aplicacións para iOS e para Android e incluso en consolas de videoxogos. Na Xbox 360 hai tempo que podemos acceder a este servizo, pero agora estréase na PlayStation 3 (podemos atopalo en Servicios de TV/Vídeo->Mis canales), e para celebralo están a ofrecer ofertas para os usuarios da PS3.
Por unha banda temos que mediante o código wuakiplay podemos ter un primeiro aluguer de balde no servizo, e por outra banda, os subscritores de PlayStation Plus tamén poderán contratar un plan Premium de Wuaki.tv pagando só 4,17 euros/mes durante o primeiro ano (en vez dos 6,99 euros/mes habituais) introducindo o código wuakipsnp. Este plan Premium ofrece acceso ilimitado a máis de 2.000 títulos de cine e series de televisión, que tamén podemos probar de balde por un mes e que carece de compromiso de permanencia. As películas de estrea, pola contra, ofrécense habitualmente a prezos de entre 1,99 e 3,99 euros entre as que figuran os filmes que están a estrearse en soporte físico nestas datas como Iron Man 3, Posesión Infernal e Oblivion.