Xbox inicia as súas rebaixas de verán

Cando comeza o verán chegan tamén as rebaixas nas distintas tendas dixitais de videoxogos, e hoxe mesmo é cando Microsoft se lanza de cheo ás promocións co seu Ultimate Game Sale, un período de ofertas que afecta a máis de 350 xogos, hardware e accesorios ata o 10 de xullo, co que buscan que os usuarios de Xbox poidan adquirir xogos a un prezo atractivo para gozar dos mesmos durante o tempo estival. Amais, os subscritores Gold recibirán un desconto adicional do 10%, de xeito que estas ofertas son aínda máis atractivas.
Dende Microsoft destacan que entre os xogos en oferta están Halo Wars 2, o lote de Far Cry 4 con Far Cry Primal e Titanfall 2 a dende 32,55, 24 e 20 euros respectivamente; pero son moitas máis as grandes ofertas para usuarios de Xbox One como Battlefield 1 por 28 euros, Dark Souls III por 28 euros, Dead Rising 4 por 35 euros, Deadpool por 16,5 euros, FIFA 17 por 21 euros, Final Fantasy XV por 29,99 euros, Gears of War 4 por 32,49 euros, Quantum Break por 21,45 euros, STEEP por 35 euros ou Ultimate Marvel vs. Capcom 3 por 14,99 euros.
Tamén hai numerosos xogos de Xbox 360 con descontos de ata o 85%, que grazas á retrocompatibilidade de moitos dos mesmos poden supor unha excelente oportunidade para facerse con grandes xogos a prezos axustados.