YouTube incorpora anotacións nos vídeos

O novo servizo permite desenvolver xogos interactivos

Os servizos web coma Flickr permitían facer anotacións nas nosas fotografías (para marcar os nomes das persoas que aparecen ou describir obxectos) e agora YouTube fai algo semellante cos vídeos indo incluso máis aló. Así, estrea as anotacións de vídeo, que permiten engadir aos nosos clips caixas de textos que poden empregarse para engadir información de interese ou coma elemento narrativo, pero que incluso están abertos á interacción, de xeito que serven para crear historias con varias posibilidades (algo semellante ao concepto dos libro-xogos) ou para establecer ligazóns a outros vídeos de YouTube.
Polo momento só é posible engadir estas funcións aos nosos vídeos se accedemos a YouTube na súa versión en inglés, e polo momento tal efecto só funciona dentro de YouTube (no futuro poderase utilizar este efecto nos vídeos incrustados noutras webs).
Para facernos unha idea das posibilidades desta nova prestación dende YouTube prepararon varios vídeos nos que se ilustra o truco da carta máxica, unha historia dun salto de avioneta en paracaídas narrado coma se fose un cómic e un xogo interactivo consistente en atopar a bola vermella debaixo de 3 vasos de plástico.

As anotacións permiten facer narración tipo cómic