YouTube incorpora botóns de compra durante a reprodución dos seus vídeos (para o público estadounidense)

Como exemplo podemos ver que durante un videoclip de Katy Perry aparecen os botóns de compra da súa canción en Amazon MP3 e iTunes

O modelo de negocio de YouTube é todo un misterio, pois xa dende a súa compra por parte de Google parecía difícil poder manter economicamente o servizo presentando un bloque de publicidade durante as buscas, e nos últimos meses están a experimentar distintos formatos publicitarios que se poidan adaptar ao formato de vídeo, sendo a última innovación a incorporación de botóns Click-to-buy en vídeos musicais ou trailers de videoxogos, de xeito que mentres escoitamos unha canción se nos insta a mercala en Amazon MP3 ou en iTunes, e mentres vemos un avance dun xogo tamén podemos adquirilo en Amazon de xeito doado.
As ligazóns para mercar música e videoxogos están presentes polo momento en clips de EMI Music ou do videoxogo Spore (de Electronic Arts), e coma plataformas de comercio electrónico asociadas se limitarían polo momento a iTunes e Amazon, aínda que agardan que pouco a pouco outras industrias se vaian sumando a esta iniciativa, pois esta fórmula de promoción comercial estaría bastante ben dirixida ao seu público obxectivo.
Dende YouTube pretende ir engadindo ligazóns ás compras de temas musicais na meirande parte dos seus vídeos musicais e, aínda que nos primeiros meses esta solución só se aplicará a usuarios norteamericanos, agardan unha futura expansión internacional.
Con esta innovación en YouTube, o portal de vídeos de Google reduciría a súa dependencia dos anuncios, e se metería de cheo no comercio electrónico, de xeito que podería aproveitar a temática dos vídeos en reprodución para suxerir a adquisición de programas de televisión, películas, libros, revistas e toda clase de produtos. Este tipo de ligazón normalmente é moito máis rendible que os anuncios, pois en vez de xerar ingresos publicitarios se transforman en comisións de compra.