Zuckerberg declara no xuízo que analiza o impacto das redes sociais na saúde mental da mocidade

O macroxuízo que se celebra en Los Ángeles contra Meta e Google entrou esta semana nun dos seus momentos máis decisivos coa declaración de Mark Zuckerberg. O proceso busca determinar se Instagram e YouTube foron deseñadas deliberadamente para fomentar o uso compulsivo entre menores e se as compañías ignoraron advertencias internas sobre os riscos para a saúde mental da mocidade. A vista xudicial, que acumula máis de 1.600 demandas similares en todo o país, podería marcar un precedente histórico sobre a responsabilidade das plataformas dixitais.
A chegada de Zuckerberg ao xulgado xa anticipou a tensión da xornada. O director xeral de Meta entrou escoltado por membros do seu equipo que lucían lentes Ray‑Ban Meta, detalle que provocou incomodidade inmediata: a xuíza advertiu que calquera gravación con dispositivos deste tipo podería supoñer desacato ao tribunal.
No estrado, Zuckerberg mantivo un ton contido pero crecente impaciencia ante o interrogatorio do avogado Mark Lanier, que buscou demostrar que Meta non só coñecía a presenza masiva de menores de 13 anos en Instagram, senón que chegou a considerar estratéxico captar usuarios de 10 a 12 anos para “gañar entre adolescentes”. Documentos internos presentados pola acusación mostran que os menores de 11 anos tiñan taxas de retención moi superiores ás dos usuarios maiores, e que a compañía estudou como aumentar o tempo que estes nenos pasaban na plataforma.
Zuckerberg admitiu que moitos menores menten sobre a súa idade e que a verificación é “moi difícil”, pero negou que captar usuarios cada vez máis novos fose un obxectivo corporativo. Defendeu que Meta elimina contas cando detecta que pertencen a menores e insistiu en que a empresa prioriza o “valor para o usuario” por riba do tempo de uso, malia que correos internos mostran obxectivos explícitos de aumentar a duración media das sesións.
Outro dos puntos máis controvertidos foi a decisión de levantar a prohibición temporal dos filtros de realidade aumentada que simulan cirurxía estética. Zuckerberg argumentou que non existían probas concluíntes de dano que xustificasen unha restrición total e que limitar estas ferramentas sería “paternalista”. A acusación contrapuxo informes internos e testemuños de directivos que advertían do impacto destes filtros na saúde mental das usuarias máis novas, incluíndo casos persoais de dismorfia corporal.
A defensa tentou presentar a Zuckerberg como un executivo preocupado polo benestar dos menores, lembrando que chegou a contactar con Tim Cook en 2018 para explorar colaboracións sobre seguridade infantil. O CEO insistiu en que a compañía equilibra expresión e protección, e que non existe evidencia científica suficiente para atribuír ás plataformas unha causalidade directa nos problemas de saúde mental da mocidade.
Mentres tanto, na sala, pais de menores falecidos ou afectados por problemas asociados ao uso intensivo das redes sociais seguiron a declaración en silencio. Para eles, a presenza física de Zuckerberg no estrado representa unha oportunidade de que o executivo “vexa” o impacto humano das decisións empresariais que agora se examinan ante un xurado.
O xuízo continuará nas vindeiras semanas con declaracións de antigos empregados de Meta e executivos de YouTube. O veredicto, cando chegue, podería redefinir non só a responsabilidade legal das plataformas, senón tamén o futuro do deseño das redes sociais nun momento no que a sociedade cuestiona cada vez máis o seu impacto sobre a saúde mental dos máis novos.