Acusan a Facebook de ter acordos secretos para facilitar o acceso aos datos dos seus usuarios

As polémicas sobre o uso dos datos persoais dos usuarios de Facebook resístense a deixar a actualidade, e as declaracións de Zuckerberg ante as autoridades estadounidenses e europeas cada vez resultan menos cribles, pois non cesan de atoparse exemplos de cesións de datos que segundo as declaracións oficiais anteriores non se terían producido.
Tras confirmarse que Facebook tiña en vigor numerosos acordos con fabricantes de móbiles (incluíndo a compañías chinesas baixo a lupa do Goberno dos EE.UU.) aos que facilitáballes o acceso a datos dos usuarios dun xeito privilexiado, agora o The Wall Street Journal acusa a Facebook non ter pechado a billa do acceso especial aos datos dos amigos dos usuarios en 2015, ou mellor dito, a facelo só de xeito selectivo, ou sexa, que o sistema empregado por Cambridge Analytica para abusar do acceso aos datos dos usuarios non se tería erradicado totalmente, senón que permanecía accesible para unha serie de empresas incluídas nunha listaxe branca.
Entre as compañías cun acceso privilexiado aos datos dos usuarios de Facebook estarían RBC Capital Markets e Nissan Motors, aínda que aseguran ser moitas máis, ao que dende Facebook responden matizando que tal situación só foi temporal, e que nos casos de compañías coas que chegaron a acordos despois de 2015 o acceso que tiñan aos datos dos usuarios non era tan amplo como deron a entender dende o xornal norteamericano.
Xustificado ou non, o caso é que estamos ante outro exemplo máis da falta de transparencia de Facebook, que probablemente levará a que teña que volver dar contas ante as autoridades, pois están a acumularse os casos nos que as prácticas de Facebook non se axustan ao que aseguraron publicamente nos últimos meses.