A Aula TIC PEME organiza un novo obradoiro virtual sobre xestión de clientes con software libre
venres, 26 de maio do 2017
A Aula TIC PEMES (ATP) da Universidade de Santiago
organiza unha
nova edición do seu obradoiro virtual sobre xestión de relacións
con clientes (CRM) baseado na ferramenta de software libre vTigerCRM.
Este programa formativo, dirixido fundamentalmente a autónomos e
pequenas e medianas empresas (PEME), está aberto á participación
de maiores de 16 anos e desenvolverase desde o 2 de xuño ata o 12 de
xullo. A acción formativa, que se artella en 50 horas,
desenvolverase en liña e cunha “marcada orientación práctica”,
informan os organizadores, que engaden que as persoas interesadas en
participar neste obradoiro virtual poden formalizar a súa inscrición
até o 2 de xuño a través da web, cumprimentando un formulario
de matrícula específico.
O prezo xeral de inscrición é de 60 euros.
Porén, sinala a Aula TIC, as persoas que garden algún tipo de
vencellos coa USC poderán beneficiarse dun desconto do 50% nas taxas
de matrícula. Asemade, a organización desta actividade formativa
tamén contempla descontos de seis euros nas matrículas de grupo de
cinco ou máis persoas. Unha vez rematado o período formativo, as
persoas inscritas recibirán un certificado acreditativo emitido pola
Aula TIC PEMES da USC.