A CNMC abre expediente sancionador a Telefónica polo seu abandono das redes de cobre

O marco español de telecomunicacións leva uns anos de grandes cambios, e a división entre as vellas conexións de par de cobre das que Telefónica era o operador dominante e as redes baseadas en fibra óptica está a diluírse, en boa medida porque Telefónica mudou de estratexia radicalmente, apostando decididamente pola fibra óptica ata o fogar, deixando as vellas redes nun segundo plano e incluso deixando tecnoloxías como o ADSL só para os usuarios aos que non pode chegar con fibra óptica, o que está a ter efectos perniciosos para as compañías e os usuarios que non gozan das novas redes de comunicación, o que levou á Comisión Nacional dos Mercados e a Competencia a incoar un expediente sancionador a Telefónica por indicios de irregularidades na xestión das avarías nas liñas de cobre que alugan aos operadores alternativos.
Os datos dos que dispón a CNMC reflectirían unha degradación no mantemento da rede de cobre de Telefónica e nos servizos que presta aos operadores alternativos, superando o prazo de 15 horas para o tempo medio de reparación de avarías na súa rede.
Telefónica tamén tería atribuído aos operadores avarías que lle son imputables, polo que se enmascara o nivel real de mantemento da rede de Telefónica.
Aínda que polo momento só se fala de indicios, a investigación da CNMC durará un máximo de un ano, prazo no que se resolverá o expediente ao que Telefónica pode presentar alegacións no prazo dun mes.
Cómpre lembrar que Telefónica ten previsto que de aquí a 2020 todos os concellos de máis de 1.000 habitantes teñan cobertura de fibra óptica, de aí que estea a apagar progresivamente as centrais de ADSL, o que podería considerarse algo razoable se temos en conta que está a implantarse unha mellora tecnolóxica, pero os organismos reguladores da competencia deberán establecer as medidas que fagan que estes cambios non prexudiquen aos consumidores.