Propoñen que as chamadas comerciais se realicen dende números co prefixo 400

O Goberno propón a creación dun novo rango de numeración telefónica, co prefixo 400, destinado especificamente ás chamadas comerciais, co obxectivo de facilitar a súa identificación por parte da cidadanía e reforzar a protección fronte ás comunicacións non desexadas ou fraudulentas.
A Secretaría de Estado de Telecomunicacións e Infraestruturas Dixitais publicou dúas resolucións que se someten a trámite de audiencia pública e que establecen rangos de numeración diferenciados para as chamadas comerciais e para as de atención ao cliente. Ambas as dúas medidas dan cumprimento ao establecido na Lei de Servizos de Atención á Clientela (SAC), aprobada en decembro pasado, e compleméntanse co Plan anticalotes telefónicos e por SMS posto en marcha en marzo de 2025.
Segundo a proposta, as chamadas comerciais empregarán un novo rango de nove díxitos que comezará polo prefixo 400. Esta numeración permitirá aos usuarios identificar de maneira clara este tipo de comunicacións e decidir se desexan atendelas ou non. Ademais, tratarase dunha numeración bidireccional, polo que os clientes poderán tanto recibir como realizar chamadas, cun custo que non poderá superar o dunha chamada ordinaria.
No caso das chamadas de atención ao cliente, isto é, aquelas que realizan as empresas para contactar cos seus clientes ou xestionar contratos en vigor, as resolucións establecen que só poderán efectuarse desde números curtos especificamente atribuídos para ese fin (como o 1004), desde rangos gratuítos (800 e 900) ou desde números xeográficos. Queda así expresamente prohibido o uso de numeración móbil para este tipo de chamadas.
Cando a nova numeración estea plenamente operativa, os operadores de telecomunicacións deberán bloquear todas aquelas chamadas comerciais ou de atención ao cliente que non empreguen os rangos establecidos. O obxectivo é pechar a porta a prácticas irregulares e reducir de maneira significativa as molestias e os riscos para os usuarios.
A Lei SAC introduce tamén a obriga de renovar cada dous anos os consentimentos dos usuarios para recibir chamadas comerciais e declara nulos os contratos formalizados a través de chamadas realizadas sen consentimento previo.
Estas medidas inscríbense na estratexia máis ampla de loita contra as estafas telefónicas e por SMS. Desde a entrada en vigor do Plan anticalotes, en marzo de 2025, os operadores bloquearon máis de 169 millóns de chamadas e máis de 10 millóns de mensaxes con intencións fraudulentas. Coa nova numeración, o Goberno asegura dar un paso máis no seu compromiso de protexer á cidadanía e garantir un uso máis seguro e transparente das comunicacións telefónicas.