A CNMC libera a Telefónica de ofrecer liñas de telefonía fixa a outras compañías

Evolución das liñas de telefonía fixa residencial en función de se están asociadas a liñas de banda larga

Historicamente Telefónica era o operador telefónico dominante no sector da telefonía fixa, sustentando practicamente a totalidade da infraestrutura que permitía este tipo de comunicacións, pero o mercado foi evolucionando, facendo desaparecer paulatinamente as vellas liñas telefónicas baseadas en par de cobre e reducindo significativamente a presenza de liñas de voz fixas non asociadas a banda larga (que actualmente non chegan ao 10%) o que levou á Comisión Nacional dos Mercados e a Competencia a desregular o mercado maiorista de acceso e orixe das chamadas en redes fixas.
Deste xeito, Telefónica deixará de estar obrigada a dar acceso aos operadores alternativos que queiran ofrecer o servizos de telefonía fixa onde non conten con rede de seu, atendendo así aos cambios do mercado, no que cada vez é máis frecuente que as liñas de voz estean asociadas a conexións de fibra óptica e, en caso contrario, sexa a telefonía móbil a que achegue a conectividade para as numeracións fixas non asociadas a un servizo de banda larga (a finais do ano pasado xa era así no 76,10% dos casos).
Enténdese que non é preciso establecer un control regulatorio sobre o mercado das liñas telefónicas fixas independentes, de xeito que Telefónica deixará de ter a obriga de ofrecerllas a outros operadores nun prazo de 6 meses.