A Cámara da Coruña programa media ducia de cursos TIC para a mocidade

Co inicio do novo ano, a Cámara e A Coruña ofrece unha variada oferta formativa dirixida á mocidade rexistrada no Sistema Nacional de Garantía Xuvenil, que lles permita mellorar a súa empregabilidade para facilitar o seu acceso ao mercado laboral. Todas estas actividades están subvencionadas ao 100% polo Fondo Social Europeo e a entidade cameral, que informa que os cursos foron elaborados “para responder ás necesidades reais das empresas”.
Na listaxe inclúense varias actividades formativas relacionadas coa transformación tecnolóxica: o curso de Excel e Power BI (de principiante a avanzado), que se desenvolve do 22 de xaneiro ao 22 de marzo; o curso de MOS (Microsoft Office Specialist), que se celebra do 29 de xaneiro ao 12 de abril; o de Deseño e desenvolvemento de videoxogos (do 29 de xaneiro ao 9 de abril), o de Visual Merchandising (do 19 de febreiro ao 25 de abril), o de Xestión de redes sociais, Canva e creación de fotos para redes (do 21 de febreiro ao 30 de abril), o de Deseño 3D (do 10 de abril ao 13 de xuño) e a segunda quenda do curso de Excel e Power BI (de principiante a avanzado, entre o 24 de abril e o 27 de xuño.
Podemos consultar todo o catálogo de formación en liña ao completo na web da Cámara, ademais de facer as nosas inscricións.
O programa de cursos enmárcase no Programa Integral de Cualificación e Emprego (PICE), que é un dos instrumentos que articulan en España o Programa Operativo de Emprego Xuvenil do Fondo Social Europeo para apoiar a redución da taxa de desemprego entre os mozos, mellorando a súa cualificación e empregabilidade e promovendo o autoemprego.