A Deputación da Coruña homenaxea a Rosalía este xoves nas redes sociais
mércores, 22 de febreiro do 2017
A Deputación da Coruña sumouse de cheo ás
celebracións do Día de Rosalía de Castro (este 24 de febreiro),
festexos impulsados
pola AELG e que, como lembramos os días pasados dende Código Cero,
teñen un piar posto nas redes sociais. Esta vertente a cabalo
entre o tradicional e o innovador tamén está presente nas
actividades previstas pola entidade provincial coruñesa. De
feito, a área de Cultura da Deputación ten programado un tributo,
#quenforapedra, para desenvolver ao pé do monumento a Rosalía da
Alameda de Santiago. Agasallarase o libro Quen fora pedra
(que recolle unha investigación de Miguel Anxo Seixas sobre a
historia da estatua) e desenvolverase unha sesión colectiva de
fotografías a carón da estatua para logo seren publicadas nas redes
sociais coas etiquetas #quenforapedra e #Rosalía1917_2017.
A cita será este xoves 23 ás 12.00 horas. O
motivo? Homenaxear a nosa senlleira escritora (no 180 aniversario do
seu nacemento) da maneira máis participativa e sen perder de vista
as novas canles de comunicación (achegando un claro reclamo para as
novas xeracións). Participarán no acto o presidente e a
vicepresidenta da Deputación, Valentín González Formoso e Goretti
Sanmartín Rei, o alcalde de Santiago, Martiño Noriega, o presidente
da Asociación de Escritores e Escritoras en Lingua Galega (AELG),
Cesáreo Sánchez Iglesias e o presidente da Fundación Rosalía de
Castro, Anxo Angueira. Contarase coa actuación musical do grupo
Habelas Hainas, que interpretará diversos temas de Rosalía de
Castro, e a lectura de poemas por parte de rapazas e rapaces de
distintos institutos de secundaria da cidade de Santiago de
Compostela. O acto tamén servirá para celebrar o século de “vida”
do monumento compostelán adicado a Rosalía.