A Universidade de Vigo acolle do 27 ao 30 de xuño un Curso de Seguridade Telemática
mércores, 22 de xuño do 2011
Unha
ducia de especialistas en seguridade informática de toda España participarán no
Curso
de Seguridade Telemática 2011 que organiza a Universidade de Vigo en
colaboración coa empresa galega de seguridade informática, Hermes Sistemas.
Dende o 27 de xuño e durante catro días os participantes deste curso exporán os
retos e avances de diversos aspectos da seguridade informática no ámbito
empresarial. O obxectivo deste encontro é mostrar unha visión actual e completa
sobre a protección da información corporativa, incidindo na importancia de
combinar o rigor técnico e xurídico para lograr un sistema de seguridade
axeitado que soporte e garanta o correcto funcionamento dos procesos de
calquera organización empresarial.
O desenvolvemento de aplicacións seguras, a seguridade en ámbitos Microsoft, as
auditorías de seguridade, a implantación dun plan de xestión da
confidencialidade e a privacidade ou a adecuación á LOPD serán algúns dos temas
que se abordarán durante a celebración de este curso.
Entre os relatores presentes no curso de Seguridade Telemática 2011 da
Universidade de Vigo figuran José Parada, responsable de seguridade corporativa
de Microsoft Ibérica, José Ángel Valderrama Antón, xerente de novas Tecnoloxías
de AENOR, Ricard Martínez responsable da Área de Estudos da Axencia Española de
Protección de Datos 2007-2011 e profesor na Universidade de Valencia e U.O.C.
,Emilio Aced Felez, subdirector da Axencia de Protección de Datos da Comunidade
de Madrid e Alfonso Sestelo, xerente do Centro Tecnolóxico de
Telecomunicaciones de Galicia.
O curso de Seguridade Telemática 2011 vai dirixido a futuros expertos en
seguridade así como a profesionais do sector, non obstante o codirector do
curso, José Luis Rivas, xerente de Hermes Sistemas, sinala que é unha grande
oportunidade para os profesionais da seguridade informática para coñecer as
novidades dun sector que evoluciona rapidamente e na que os seminarios e os
cursos, como o organizado pola Universidade de Vigo, son imprescindibles para
estar ao día.
