Un encontro na Coruña analizará o impacto da IA no podcasting

Galicia Podcast Summit regresará á Coruña o vindeiro 17 de xuño para reunir creadores, profesionais do márketing, produtores e especialistas en comunicación nunha xornada centrada no impacto da intelixencia artificial sobre a creación, distribución e monetización dos contidos dixitais.
Na súa cuarta edición, o encontro consolídase como un dos principais puntos de encontro da comunidade galega vinculada ao podcasting, á comunicación dixital e á economía dos creadores. A programación deste ano prestará especial atención a algúns dos cambios máis significativos que atravesa actualmente o sector, como a incorporación de ferramentas de intelixencia artificial nos procesos de produción, o auxe do videopodcast, a aparición de novos modelos de negocio e a importancia do networking presencial nun escenario cada vez máis automatizado.
A cita contará coa participación de dez profesionais procedentes de distintos ámbitos relacionados co podcasting, o marketing e a creación de contidos. Entre os relatores figuran Manolo Rodríguez, Lara Capeans e María Gómez Domínguez. Ademais dos relatorios e mesas de conversa previstas, habilitaranse espazos específicos para favorecer o intercambio de experiencias e impulsar novas oportunidades de colaboración entre creadores, empresas e institucións.
«O podcasting está a vivir unha das transformacións máis importantes da súa historia. A intelixencia artificial está a modificar os procesos de produción, os hábitos de consumo seguen evolucionando e as marcas apostan cada vez máis por construír as súas propias canles de comunicación», sinala Leandro Menéndez, coorganizador de Galicia Podcast Summit.
Menéndez explica que o obxectivo do evento é «reunir as persoas que están a participar activamente nesa evolución e crear un espazo onde poidan compartir experiencias, intercambiar ideas e comprender mellor as oportunidades e os desafíos que formula esta nova etapa para a industria».
A iniciativa está promovida por integrantes da comunidade galega de podcasting e comunicación dixital coa intención de fortalecer as conexións entre creadores, empresas e organizacións interesadas no desenvolvemento de proxectos baseados en contidos de audio e vídeo.
O encontro celebrarase no Centro Municipal de Empresas Accede Papagaio da Coruña, e as entradas poden reservarse sen custo a través da páxina web oficial do evento.