A Xunta lembra que o INE rexistra un importante incremento do fogares con acceso á Rede en Galicia

A consultora Tatum deu a coñecer nos últimos días o seu informa anual sobre o estado da Internet en España e no mundo, no que destacan que as comunidades autónomas que quedan por debaixo dunha penetración da Internet do 50% son Murcia, Galicia, as dúas Castelas, Estremadura e Andalucía, instando á súa mellora e denunciando que o crecemento anual da penetración da Internet é moi reducido, o que parece ter levado á Xunta a reaccionar, para negar a maior e, tirando proveito dos últimos datos do Instituto Nacional de Estatística (INE), asegurar que aínda que é certo que o acceso á Rede só está presente no 48,9% dos fogares galegos, o incremento anual foi do 15,6%, superando sobradamente o 9,4% da media española.
Pese a que o acceso á Rede non é posible dende todos os fogares, o número de galegos que fan uso da Internet si supera á metade (é do 53,6%) e no caso da poboación de entre 16 e 24 anos supera o 90%, de xeito que non se manifesta unha importante caída no uso da Rede ata que entramos en grupos de poboación de máis de 45 anos, ou sexa, que a principal fenda dixital en Galicia parece vir provocada pola envellecemento da nosa poboación.
O incremento do acceso á Internet a través de conexións de banda larga en Galicia tamén tivo un incremento interanual superior á media estatal (foi do 21,4% entre 2009 e 2010) e aínda que a tecnoloxía máis empregada para acceder á Rede en Galicia sexa o ADSL (no 55,6% dos fogares), en Galicia destaca especialmente a forte presenza dos accesos por cable (31,9% dos fogares con conexión á Rede) e por conexións móbiles de banda larga (22,9%).